الحلقة الثامنة من رواية ولد الموجيره. رواية بالدارجه التونسية تاليف وكتابة محمود الحرشاني

.بدا السبتي يتقلق من تصرفات التركي خاصة بعد عملتو مع المقال سي وحيد وقت ما طلبو منو المقاول سي وحيد يشوفلو من دوارهم بنيه تخدم في الدار وتعاون زوجتو اللي ولدت ما عندهاش برشه على قضيه الدار وتوصل الصغار للمكتب. السبتي تغشش برشه على التركي وقالو كيفاش تعمل ها العمله هاذي من ورايا ومن غير ما تشاورني..لكن التركي من طبعو ما يحشمش.. المهم يدبر راسو .وهو كل اللي يهمو انو زهرة تقرب بحذاه.. وتولي رجلو خفيفه على دارهم الجديدة اللي باش يعطيهالهم المقال يسكنو فيها.. وبد السبتي يفركس على اي سبب باش يطرد التركي وما عادش يسكن معاه في البيت اللي يسكنو فيها ..التركي كيف جا من البلاد جاب قصبة معاه.القصبة اللي يقولولها شبابه. ماهو وقت اللي في دوار الهشيم راعي بالغنم والبقرات كان وقت اللي يحب بقصر النهار يعمل ضربات بالقصبة ويالف وحدو الاغاني..هو في الحقيقة يهز من الجابية ويحط في الخابيه. ولكن هو ها الكلام هذا يسميه غناء وخاصة وقت اللي تسخن فيه الشمس ..يجبد القصبة من تحت القشابيه اللي لابسها ويبدا يهز في الطرق.على صالحي. على بدوي ومرات تحكملو يدورها ذكر على الرسول واولياء الله الصالحين. اما اذا جب يغني على زهره فوقتها يهبل ويبحر خلاص نهار سمعو باباها وهو يغني على زهره من غير ما يفيق بيه قالو ها طفل ها زهره اللي تغني عليها..ياخي وليت اسماعيل الحطاب والا الجرماني ماهو باباه زاده عندو الهيلة متاع الغناء.. ومغروم باسماعيل الحطاب وكان ما يفلتش حصة من برنامج قافلة تسير باش يسمع اسماعيل الحطاب وهو يغني بالصالحي حتى انو نهار دخلتو عليه زوجتو خالتي منى وهو متحمل الرديون ويتبع في اسماعيل الحطاب يغني قتلو يا راجل اشبيك يا خي هبلت والا اشبيك.قوم شوف مصلحتك خير.. يا خي باش تحب تولي تغني في الاعراس والد التركي ما عندو غرام كان باسماعيل الحطاب والجرماني يحب بسمعهم ديمة ومرات يحب قاسم كافي.ا التركي تغرم حتى هو ببرنامج قافلة تسير وكان نهار الجمعه يروح بالغنم والبكرات بكري قبل ما يبدا البرنامج في الحداش باش ما يفوتوش اسماعيل الحطاب في الرديون وفي مره من المرات بدا البرنامج وباباه موش موجود عاد خالتي منى امو دخلت تجري وقاتلو ما تعرفش اللي باباك زاده يحب قافلة تسير كيفاش تحلها قبل ما يجي.. سكر الرديون حتان يجي باباك ونسمعوها مع بعضنا السبتي بدا يقلق من تصرفات التركي وخاصة بيعد ما يبدا يخدم مع المقالول سي وحيد ونجم يقنع عم حميده باش يجي لتونس هو عائلتو باش بنتو ومرتو يخدم في دار سي وحيد وهو يتولهى بالسانيه وما نجمش ينسى للتركي ها العمله رغم مضي اكثر من ثلاثة اشهر على قدوم عم حميده وعائلتو لتونس وبدات بنتو زهره ومرتو يخدمو في دار سي وحيد. قالو كيفاش تعمل ها العمله هاذي .. احنا ما عندناش في تقالدينا بنات تخدم في ديار الناس.. انتن دبرت ها الحكاية هذا باش تقرب زهره وتاثر على عم حميده زعمه زعمه عملت عليه مزيه ونقضتو من الفقر في دوار الهشيم كان يقللو ديمه اسمع يا التركي .. راني نعرفك واطي وما تجيش راجل.. تحساب عم حميده باش يحصلك ويخليك ماشي جاي على دارو تتسبب باي حاجه باش تشوف بنتو زهرة وتقربلها. انا باش نكشفلك اوراقك الكل وانفشلك العجل.. يا هامل يا واطي.. نستاهل انا اللي جبتك لتونس.. يا اخي انت متاع تونس وادي الهشيم وياسر فيك. التركي يجبد القصبة من جيبو ويقوللو تحبش انسمعك طرق صالحي ..يبردلك على ما بيك وقتها يطلع الدم في راس السبتي ويقللو بالحرام لا تبات فيها الليلة . بره ارقد تحت الحيوط يا هامل وزيد باش انلغ عليك الحاكم ونحطك في بودفه باش تتربى

……….

وغدا حلقة جديدة من رواية ولد الموجيره تاليف وكتابة الدكتور محمود حرشاني